Куырдалæгон

Куырдалæгон — уæларвон куырд, куырдты бардуаг ирон мифологийы. Аразы згъæртæ, хотыхтæ æмæ æндæр хæстон дзаума; цалцæг кæны тохы чи фæхъæн ис, уыцы Нарты сæры кæхцытæ; сæ бæхтæн сын садзы цæфхæдтæ.

Куырдалæгон йæ уæларвон куырдадзы бахсыста нарты Сослан æмæ Батырадзы. Сарæзта нартæн гутон. Нартимæ цæры хæларæй: уæларвы йæм бирæ рæстæджы дæргъы уазæгуаты вæййынц номдзыд нарт. Куырдалæгон йæхæдæг дæр у зынаргъ уазæг нарты куывдты. Афтæ нымадтой, зæгъгæ, æхсæны куывдтæ æмæ хистытæй хъæубæсты куырдтæн хай чи нæ бакæна, кæнæ хъæугуывдты Куырдалæгоны номыл æмæ хъæубæсты куырдты цæрæнбоны тыххæй сидт чи нæ рауадза, ууыл Куырдалæгон йæ маст акаолдзæн.

Æввахс хъæуты цæрæг куырдтæ алы аз дæр Куырдалæгоны номыл æргæвстой фыс æмæ дзы куырдтой æнтыстдзинад сæ куысты, сæ хъуыддæгты.