Фонсекæ Амадор, Карлос

Сæрибар энциклопеди Википедийы æрмæг.
Карлос Фонсекæйы тыххæй чиныджы уæлцъар

Карлос Фонсекæ Амадор (исп. Carlos Fonseca Amador; 1936 23 июны1976 7 ноябры) уыд никарагуæйаг революционер, «Национ Ссæрибары Сандинистон Фронты» бындурæвæрджытæй иу, профессор, революцион змæлды теоретик.

Фонсекæ райгуырд Матагальпæйы, Никарагуæйы цæгат-ныгуылæны. Йæ фыд, Карлос Фаусто Амадор, уыд бонджын къофигæнджыты мыггагæй. Цалынмæ йæ фырт астæуккаг скъоламæ цæуын байдыдта, нæ базыдта, йæ фыд кæй у, уый. Фонсекæйы мад уыдис мæгуыр гæрзтæхсæг сылгоймаг Хустинæ Фонсекæ (исп. Justina Fonseca), Амадорæй басывæрджын æнæкъайадæй. Карлос Фонсекæ йæ мады тынг уарзта, уымæн цыт кодта. Кæд æмæ испайнаг традицимæ гæсгæ йæ ном хъуамæ фыстаид Амадор Фонсекæ (фыды мыггаг, уый фæстæ та мады мыггаг), йæхи фыста æдзух куыд Фонсекæ Амадор (мады мыггаг фыццаг бынаты).

Леоны университеты куы ахуыр кодта, бацыд Никарагуæйы социалистон партимæ (исп. Partido Socialista Nicargüense); йемæ чи ахуыр кодта, уыдон дæр разæнгард кодта уыцы партимæ бацæуынмæ.

1956 азы 21 сентябры Леоны, кадджын изæры рæстæг, Ригоберто Лопес Перес диктатор Анастасио Сомосæйы амарыны фæлвæрд акодта. Ригобертойы уыцы бынаты фехстой, Сомосæ та, 1936 азæй бæстæйæн хицауиуæг чи кодта, цалдæр боны фæстæ цæфтæй амард Панамæйы рынчындоны. Фыдракæнды æмархайджыты агуыргæ, Национ Гвардийы службæгæнджытæ æрцæхстой политикон змæлдты фæсивæд. Фонсекæ дæр, кæд марæджы бынтон нæ зыдта, бахауд ахæстонмæ, фæбадти дзы дыууæ мæйы бæрц.

1976 азы 7 ноябры Карлос Фонсекæйы, уæд Сандинистты Фронты генералон секретарь куы уыди, амардтой. Йæ сæр æмæ йæ къухтæ алыг кодтой æмæ Манагуæмæ ’рбаластой, Анастасио Сомосæйы (кæстæры) бардзырдмæ гæсгæ. Æртæ азы фæстæ сандинисттæ фæуæлахиз сты, Сомосæ та бæстæйæ ралыгъд АИШ-мæ.