Фадзайты Арсен

Сæрибар энциклопеди Википедийы æрмæг.

Фадзайты Сулейманы фырт Арсен (райгуырдис 1962-æм азы 5 сентябры, Цæгат Ирыстоны Æрæфы районы, Цыколайы хъæуы) у нырыккон уæрæсейаг паддзахадон æмæ политикон архайæг, спортсмен. Паддзахадон Думæйы цыппæрæм æмæ фæндзæм æрсидты депутат. Олимпаг хъæзтыты дыууæ хатты чемпион æмæ дунейы æхсæз хатты чемпион уæгъдибар хъæбысхæстæй.

Цардафыст[ивын]

Ахуыр кодта Цыколайы астæуккаг скъолайы. 1985-æм азы каст фæци Узбекистаны физикон культурæйы паддзахадон институт сахар Ташкенты, 1997-æм азы та — Цæгат Ирыстоны паддзахадон университет. 1993–1996-æм азты уыди ЦСКА-йы командæйы сæргълæууæг æмæ Уæрæсейы уæгъдибар хъæбысхæсты иугонд командæйы сæйраг тренер. 1996-æм азæй уыди Уæрæсейы хъалонты пъæлицæйы федералон службæйы Цæгат Ирыстоны хайады хицауы хæдивæг.

2003-æм азы 7 декабры Фадзайы-фырт æвзæрст æрцыд Паддзахадон Думæмæ Цæгат Ирыстоны 22-æм иумандатон æвзарæн зылды депутатæй. Уыди парти «Рахизонты тыхты цæдис»-ы (СПС — союз правых сил) уæнг, фæлæ равзæрсты фæстæ ацыди «Иугонд Уæрæсе»-йы фракцимæ. Парламенты уыди физикон культурæ, спорт æмæ фæсивæды хъуыддæгты комитеты сæрдары хæдивæг, стæйЦæгат Кавказы проблемæты фæдыл къамисы уæнг. 2007-æм азы 2 декабры Фадзайы-фырты равзæрстой фæндзæм æрсидты Паддзахадон Думæйы депутатæй, парти «Иугонд Уæрæсе»-йы федералон номхыгъдмæ гæсгæ.

Ныртæккæ у парламенты Хæдбар паддзахæдты æмбалады (СНГ) хъуыддæгтæ æмæ æмзæххонтимæ бастдзинæдты фæдыл комитеты сæрдары хæдивæг.

Фадзайты Арсен у усджын, ис ын дыууæ сывæллоны.

Спортивон æнтыстытæ[ивын]

Фадзайты Арсен у уæгъдибар хъæбысхæсты дыууæ хатты олимпаг чемпион (1988, 1992), æхсæз хатты дунейы чемпион (1983, 1985, 1986, 1987, 1990, 1991), цыппар хатты Европæйы чемпион (1984, 1985, 1987, 1988), цыппар хатты хорзæхджын æрцыд Дунейы хъалацæй (1983, 1985, 1986, 1989). ССР Цæдисы сгуыхт тренер. Фадзайы-фырт у хорзæхджын ахæм ордентæ æмæ майдантæй:

  • «Кады нысан» (1985);
  • Адæмты хæлардзинад орден (1988);
  • Фæллойы сырх тырысайы орден (1989);
  • майдан «Ирыстоны Намысæн» (1995).