Зындон (ирон мифологи)

Зындон — æппæты дарддæр æхгæд къуым мæрдты бæсты ирон мифологийы. Йæ дæгъæл ис Барастырмæ. Мæрдтæ зындоны æфхæрд цæуынц паддзах Барастыры бардзырдмæ гæсгæ, уæлæуыл, æгас уæвгæйæ, цы тæригъæдты бацыдысты, уыдон хынцгæйæ.

Мæрдты бæстæйы иу хай, фыдгæнджытæ кæдæм бахауынц, уый. Уым сæ тæригъæдтæ фыдтухитæй фидынц. Чи дзы йæ къахæй ауыгъд у, чи – йæ цонгæй, чи – йе 'взагæй, чи та йæ хурхæй, сæ быны дойнаг дуртæ цырынæй судзынц. Уæлæуыл цы бирæ æвзæрдзинæдтæ фæкодтой, уыдон Мæрдты бæсты зындзинæдтæй фидынц: афæдз сæ кæмæн æртæ боны, кæмæн къуыри, кæмæн фылдæр – ахæм хъизæмар æвзарын тæрхонгонд у Мæрдты хицау Барастырæй. Уымæй уæлдай ма, уæлæуыл мæрдтæй йæхи чи куыд æвзæр дардта, ахæм, фæсмонгонды цардæй æрвитынц сæ рæстæг Мæрдты бæсты.