Гелаты моладзандон

Сæрибар энциклопеди Википедийы æрмæг.
Перейти к навигации Перейти к поиску
Гелаты моладзандон

Мады Майрæмы моладзандон Гелаты (Кутаисы цур) — Гуырдзыстоны тæккæ зынгæдæр астæузаманон моладзандон. Динон æмæ культурон царды артдзæст. XVI æнусы дыккаг æмбисæй 1814-æм азы онг уыди католикосы резиденци. 1994-æм азы хаст æрцыд, ЮНЕСКО-йы дæлбазыр чи ис, уыцы Дунеон хæзнадонмæ.

Моладзандоны бындур æрæвæрдта Дауыт Аразæг 1106-æм азы. Йæ амæлæты фæстæ йын ам скодтой йæ зæппадз. Моладзандоны сæйраг аргъуан кæронмæ арæзт æрцыд 1125-æм азы, стæй уый фæстæ ма фондз азы йæ фæлыстой, æгас Фæскавказы хуыздæрыл нымад чи у, уыцы мозаикæйæ. Уæды заманты моладзандон уыди Гелаты академийы цæрæнран.

XIII æнусы моладзандоны ансамбльмæ бафтыдæуыд Сыгъдæг Никъала æмæ Сыгъдæг Георгийы аргъуантæ, стæй æртææддæгуæлæ дзæнгæрæгдон.

Моладзандоны къулнывтæ арæзт цыдысты æндæр æмæ æндæр дугты — XII æнусæй XVIII æнусмæ. Уыдонæй уæлдай цымыдисагдæр сты паддзæхты нывтæ.

Раздæр моладзандоны уыди бирæ зынаргъ иконæтæ æмæ практикон аивады дзаумæттæ, фæлæ сæ советон заман уырдыгæй райстой æмæ байуæрстой музейтыл.