Агънаты Гæстæн

Агънаты Гæстæн
Райгуырды датæ	1943-æм азы 15 январы(1943-01-15) (83 азы)
Райгуырæны бынат	Хъарман-Сындзыхъæу, Дыгуры район, Цæгат Ирыстоны АССР, Уæрæсейы СФСР, Советон Цæдис
Æмбæстонад (дæлхицауад)	Советон Цæдис  Уæрæсе
Архайды хуыз	фыссæг
Уацмысты æвзаг	ирон

Агънаты Æмзоры фырт Гæстæн (райгуырдис 1943-æм азы 15 январы Хъарман-Сындзыхъæуы) у ирон фыссæг, прозаик æмæ публицист, РЦИ — Аланийы фысджыты цæдисы сæрдар, Цæгат Ирыстоны адæмон фыссæг, Хетæгкаты Къостайы номыл Паддзахадон премийы лауреат.

Цардафыст

Гæстæн райгуырд 1943 азы 15 январы Хъарман-Сындзыхъæуы. Дæсæм къласы ма куы ахуыр кодта, уæд журнал «Мах дуг»-ы рацыд йæ фыццаг радзырд. Астæуккаг скъолайы фæстæ бацыд Цæгат Ирыстоны педагогон институтмæ, фæлæ йæм дыууæ азы фæстæ фæсидтысты æфсады рæнхъытæм, æмæ хæстон-денджызон флоты баслужбæ кодта цыппар азы.

1968 азы йын чингуыты рауагъдад «Ир» ныммыхуыр кодта йæ фыццаг чиныг – «Кæстæр чындз». Уыцы аз сси Мæскуыйы Максим Горькийы номыл Литературон Институты студент æмæ йæ æнтыстджынæй каст фæцис.

Куыста алы бæрнон бынæтты: республикон радиойы уацхæссæг, телеуынынады хистæр редактор (стæй та – йæ сæйраг редактор), журнал «Ногдзау»-ы бæрнон секретарь, «Мах дуг»-ы сæйраг редакторы хæдивæг.

Гæстæнæн мыхуыры рацыд къорд чиныджы: «Чындзæхсæвы размæ», «Æнахуыр изæр», «Уазæгуаты», «Фæстаг бæх», «Йæ рухс ном», «Даргъ фæззыгон фæндаг»... Цалдæр ын дзы тæлмац сты уырыссаг æвзагмæ. 2013 азы рухс федта йæ роман «Темыры кæстæр чызг». Уыцы уацмысы тыххæй райста Къостайы номыл преми.

Æддаг æрмæг

• Агънаты Гæстæнимæ интервью. «Аланийы райсом, 2019-æм азы 10 октябры.