Киров, Мироны фырт Сергей
Сæрибар энциклопеди Википедийы æрмæг.
Киров Мироны фырт Сергей (уырыс. Сергей Миронович Киров), зындгонд революционер, советон хицауады архайæг. Йæ æцæг мыггаг уыди Костриков, Киров та уыди йæ журналистон фæсномыг. Райгуырд 1886 азы 27-æм мартъийы, амард 1934 азы 1-агæм декабры.
1894 азы Сергей Костриков сси сидзæр — йæ фыд йæ бинонты ныууагъта, йæ мад та амарди. Йæ хоты йæхимæ райста йæ нана, лæппу та сидзæрдонмæ бахауди. Уржумы каст фæци приходы, стæй сахары училище. 1901 азы ацыд Хъазанмæ, бацыд Хъазаны дæллаг механикон-техникон промышленнон училищемæ, кæцы каст фæци æртæ азы фæстæ фыццаг къæпхæны хæрзиуæгимæ. Уыцы иу аз хахнывгæнæгæй скуыста Томсчы, ахуыр кодта Томсчы технологон институты цæттæгæнæн курсыты.
1904 азы, Томсчы куы царди, Костриков бацыд УСДКП-мæ (уырыс. РСДРП), йæ партион фæсномыг уыд «Серж». 1905 фыццаг хатт архайдта демонстрацийы, пъæлицæйы кусджытæ йæ ’рцæхстой. Ахæстонæй куы рацыди, уæд сси тохгæнæг балты разамонæг.
1905 Томсчы сахары партион конференци Костриковы снысан кодта партийы Томсчы комитеты уæнг. 1906 азы июлы Костриков ногæй æрцæхстæуыд, бакодтой йæ Томсчы ахæстонмæ иу æмæ ’рдæг азы æмгъуыдмæ. 1908 азæй Сергей Костриков куыста куыд профессионалон революционер, архайдта Иркутск æмæ Новониколаевсчы (ныр Новосибирск).
1909 азы уый æрбацыдис Дзæуджыхъæумæ. Æмткæй дæс азы дæргъы Киров цардис уыцы сахары. Йæ архайды мидис уыд социалистон идейæтæ Цæгат Кавказы парахат кæнын. Ам куыста кадетон газет «Терек»-ы уацхæссæгæй. Раст Дзæуджыхъæуы, газет «Терек»-мæ йæ уац раттгæйæ, фыццаг хатт спайда кодта йæ хъуыстгонд фæсномыгæй.
Дзæуджыхъæуы ма базонгæ кодта йæ суинаг бинойнаг Маркус Марияимæ. Марияйы мыггаг уыд Цæгат Кавказимæ тынг баст, уый райгуырд Дербенты цæрæг дзуттаг бинонтæн, мидхæсты дæргъы йе ’фсымæр Яковы азербайджайнаг мусаватисттæ фехстой Гуырдзыстоны Пасанаурийы станцæмæ ’ввæхс (Яковы ном хæссы, Кировы уынджы цæхгæрмæ чи цæуы, уыцы Маркусы уынг).
1912 азы Кировы æрцæхстой æмæ аластой Томскмæ тæрхон кæнынмæ. Уыцы азы 16 мартъийы тæрхон æй ссардта æнæхос, æмæ уæд Костриков-Киров фæстæмæ раздæхти Дзæуджыхъæумæ.
1918 азы уалдзыгон бонты Киров сси Терчы облæсты советы уæнг, уыцы азы июлы архайдта Фæндзæм Æппæтуæрæсейаг советты съезды, ноябры — Æхсæзæм съезды. 1919 азы куыста Астраханы рæстæгмæ революцион комитеты сæрдарæй, контрреволюцион сыстад банцайын кæны.
1920 азы, Сырх Æфсады рæнхъыты бацыдис Бакумæ. Куыд советон делегацийы уæнг архайдта Польшæимæ фидыды бадзырдыл, сси большевикты партийы Кавказаг бюройы уæнг. 1921 азы Киров сси Азербайджаны коммунистон партийы фыццаг секретарь. 1923 азы та равзæрстæуы партийы Централон Комитеты уæнг.
1926 азы Сергей Киров сси Ленинграды губернийы комитеты фыццаг секретарь, уыцы азæй разамынд лæвæрдта уыцы сахар æмæ йæ алфамбылай зæххытæн. Киров царди Каменноостровский проспекты, Бенуайы хæдзары (йæ уыцы фатер ныртæккæ у Кировы музей[1]).
[баив æй] Мæлæт
Киров Николаев Леониды къухæй амард Ленинграды. Киров Николаевы усимæ (Милдæ Драуле) гадзрахатæй цыди, уый тыххæй зæрдæхсайдæй æй амардта йæ дамбацайæ Николаев. Ис æндæр верситæ дæр, политикæимæ баст.
Кировы амарды фæстæ бирæ советон сахартæ, хъæутæ, колхозтæ æмæ æндæр рæттæ райстой йæ ном. Ирыстоны дæр ис Кировы район, Дзæуджыхъæуы — Кировы уынг æмæ Кировы номыл зонадон библиотекæ.
Киров куы амардис, уæд йæ марджыты агурыны ’фсонæй Сталин райдыдта Стыр Æфснайд. Уæд ахст æрцыдысты бирæ адæм, уыдоны ’хсæн Бухарин, Каменев æмæ Зиновьев.
[баив æй] Æддаг æрмæг
[баив æй] Фиппаинæгтæ
- ↑ Кировы мемориалон музей. Официалон сайт (уырыс.)
