Заменгоф, Лазарь Марчы фырт

Сæрибар энциклопеди Википедийы æрмæг.
Лазарь Заменгоф 1908-æм азы. Йæ зындгонддæр къамтæй иу

Людвик Лазарь Заменгоф (йæ уæрæсейаг гæххæттытæм гæсгæ Лазарь Маркович Заменгоф) уыд, æвзаг эсперанто чи æрымысыдис, уыцы лæг. Уый райгуырдис 1859-æм азы 15 декабры сахар Белосточы (ныр Польшæйы), амардис та 1917-æм азы 14 апрелы Варшавæйы. Йæ дæсныйадмæ гæсгæ уыд цæстыты дохтыр.

Лазары фыд куыста куыд немыцаг æвзаджы ахуыргæнæг, фæстæдæр уыимæ ма цензорæй: цензурæ кодта немыцаг æвзагыл æмæ та дзуттаг æвзæгтыл (идиш æмæ иврит) цæуæг периодикон мыхуыр. Йæ сабибонтæй Лазарь Заменгоф зыдта цалдæр æвзаджы, йæ мысинæгтæм гæсгæ йæ сæйраг æвзаг уыдис уырыссаг, фæстæдæр фылдæр польшæйагау дзурын байдыдта, йæ цотимæ дæр.

Гимназы фæстæ Лазарь ахуыр кодта Мæскуыйы (1879-1881) æмæ Варшавæйы (1881-1885), сси цæстыты дохтыр.

Йæ æрымыст æвзаджы афæлгæст рацыдис 1887-æм азы сæрды уырыссаг æвзагыл, уыцы чиныдж сæргонд уыдис «Доктор Эсперанто. Æхсæнадæмон æвзаг. Раздзырд æмæ ахуыры чиныг æххæстæй» (уырыс. «Д-ръ Эсперанто. Международный языкъ. Предисловіе и полный учебникъ»). Уыцы рауагъды фæстæ уыдысты польшæйаг, францаг æмæ немыцаг рауагъдтытæ. Заменгофы фæсномыг «эсперанто» тагъд рæстæджы сси, уый цы æвзаг сарæзта, уымæн йæ ног ном.