Бокарёв, Евгений
Сæрибар энциклопеди Википедийы æрмæг.
Бокарев, Алексейы фырт Евгений уыд зынгæ советон лингвист, дагъистайнаг æвзæгтæ иртасæг, йæ заманы тæккæ æххæстдæр чи уыди, ахæм уырыссаг-эсперантойаг (рауагъдад «Энциклопедия», 1966) æмæ эсперантойаг-уырыссаг (1974) дзырдуæттæ саразæг.
Уыди лингвист Бокарев Анатолийы æфсымæр.
[баив æй] Цардафыст
Райгуырди 1904-æм азы Стъарæполы губернийы Средне-Егорьевское-йы хъæуы. Ныртæккæ ацы цæрæнран хауы Ростовы облæстмæ.
Ахуыр кодта Темир-Хан-Шурайы сахары (ныртæккæ сахар Буйнакск Дагъистаны). Октябры революцийы фæстæ йæ ныййарджытæ раздæхтысты фæстæмæ Средне-Егорьевское-мæ, æмæ астæуккаг скъола Евгени каст фæци йæ райгуырæн хъæуы, 1922-æм азы.
1921-æм райдианы, ахуырдзау уæвгæйæ, Бокарев райдыдта кусын райдиан скъолайы ахуыргæнæгæй.
1922-æм азы бацыди Политехникон институтмæ, 1923-æм азы та хи раивын кодта Университетмæ, педагогон факультеты уырыссаг æвзаг æмæ литературæйы хайадмæ. Университет каст куы фæци, уæд 1925-æм азæй куыста скъолайы ахуыргæнæгæй (Цæгат Ирыстон, Дагъистан).
1931-æм азы райдыдта кусын Дагъистаны педагогон институты. Кандидаты минимум раттыны æмæ диссертаци бахъахъхъæны фæстæ ссис зонæдты кандидат, 1938-æм азы та йын лæвæрд æрцыд доценты ном. 1939-æм азы бацыди Æвзаг æмæ Хъуыдыгæныны институты (ССР Цæдисы зонæдты Академи) докторантурæмæ, фæлæ хæст кæй райдыдта, уый охыл æй каст нæ фæци. Æрсидтысты йæм флотмæ, æмæ 1941-æмы июнæй 1946-æмы июньмæ фæслужбæ кодта. Хæсты рæстæджы, 1944-æм азы бацыди Коммунистон партийы рæнхъытæм. 1946-æм азы демобилизацийы фæстæ нысангонд æрцыд Æвзаг æмæ Хъуыдыгæныны Институты сæйраг зонадон кусæгæй, 1950-æм азы та, институт сликвидацийы фæстæ Евгений Бокарев райдыдта кусын ахæм бынаты ССР Цæдисы зонæдты Академийы Æвзагзонынады Институты. Фæзиан 1971-æм азы 11 мартъийы Мæскуыйы.
[баив æй] Зонадон æмæ æхсæнадон архайд
1957-æм азы Бокарев уыди фæсивæд æмæ студентты Æхсæнадæмон VI-æм фестиваль цæттæгæнджытæй иу — разамынд лæвæрдта алыхуызон бæстæтæй эсперантистты фембæлдтытæ аразджытæн. Ацы архайд ахъаз фæци Советон Цæдисы эсперанто-змæлд ногæй райтынг кæнынæн (1930-æм азты æмбисæй нæ бæстæйы эсперантисттæ уыдысты æлхъывд, сæ цæдисы разамынд та æрцыд репрессигонд).
Бокарев бирæ сарæзта цæмæй ССР Цæдисы эсперанто ахуыр кæныны хъуыддаг æнæзакъоныл нымад мауал уа. 1962-æм азы Фæсарæйнаг бæстæты адæмтимæ хæлардзинад æмæ культурон бастдзинæдты советон æхсæнæдты Цæдисы цур сарæзтæуыд Советон эсперантистты æхсæнадæмон бастдзинæдты къамис. Бирæ рæстæджы дæргъы уый уыди эсперантистты иунæг ахæм организаци. Къамисы саразынæй лæгæн йæ амæлæты онг Евгений Бокарев уыди йæ сæрдар.
1963-æм азæй Бокарев уыди эсперантойы Академийы уæнг.
Иу рæстæджы советон лингвистикæйы райтынг ис «æрдзон» æмæ «скæнгæ» æвзæгты тыххæй дискусситæ. Уыдоны активонæй архайдта Бокарев дæр. Уыди уыцы æвзæгты ныхмæвæрды ныхмæ.
