Пакъуындзæ

Пакъуындзæ — Æхсар æмæ Æхсæртæджы райгуырды куывдæй Куырдалæгон фæстæмæ куы здæхт, уæд абадтис цæхæруады хъисыл æмæ ныппæрæст ласта уæларвмæ хæдтæхгæ Пакъуындзæйау. Пакъуындзæ иуæй-иу кадæггæнджытæ хонынц маргъ, цæры уæларв æмæ нæдæр адæмыл нымад у, нæдæр зæдтыл. Æхсæв йеддæмæ бон нæ тахтис.

Таурæгъ «Даредзанты Амран æмæ Пакъуындзæ» та нын зæгъы: «Тæхгæ Пакъуындзæ сылгоймаг уыди. Уæларв царди, æмæ йын сывæллæттæ дæр уыди. Уырдыгæй Зæхмæ тахти æмæ сын хæринаг хаста – къамбец уыдаид, теуа уыдаид кæнæ гал». Афтæмæй Бадыри æмæ Мысырби цуаны ацыдысты. Баталынг сыл. Сæ нымæттæ сæ уæлæ æрæмбæрзтой æмæ бафынæй сты. Пакъуындзæ сæ уæларвæй федта æмæ загъта: «Дæлæ хæринаг, ныццæуон æмæ сæ схæссон». Æртахти, систа сæ æмæ сæ уæларвмæ атыффытт кодта. Амран хуыцауыналат лæг уыди, лалым скодта æмæ йæ мидæг бабырыди. Пакъуындзæ ратахти, лалымы йæ ныхтæ ныссагъта æмæ, йæ сывæллæттæ кæм уыдысты, уыцы ран æй æрæвæрдта. Амран лалым атыдта, уырдыгæй ратæррæст кодта, Пакъуындзæйы дæр амардта æмæ йын йæ сывæллæтты дæр. Йе ’фсымæртæ Бадыри æмæ Мысырбиимæ, уый размæ хæйрæджытæй цы æрчъиаг байстой, ууыл сбадтысты æмæ Зæхмæ сæрæгасæй æрфардæг сты.