Икъаты Владимир

Икъаты Владимир
Райгуырды датæ	1936-æм азы 1 августы(1936-08-01)
Райгуырæны бынат	Соцъи, Цхинвалы район, Хуссар Ирыстоны автономон бæстæ, Гуырдзыстоны ССР, Фæскавказы СФСР, Советон Цæдис
Мæлæты бон	1990-æм азы 27 январы(1990-01-27) (53 азы)
Мæлæты бынат	Цхинвал, Гуырдзыстоны ССР, Советон Цæдис
Æмбæстонад (дæлхицауад)	Советон Цæдис
Архайды хуыз	поэт, тæлмацгæнæг, публицист
Хорзæхтæ

Икъаты Антоны фырт Владимир (1936 — 1990) — ирон поэт, тæлмацгæнæг, публицист, æхсæнадон архайæг, ССР Цæдисы Журналистты æмæ Хуссар Ирыстоны фысджыты цæдисты уæнг.

Цардафыст

Владимир райгуырд Цхинвалы районы хæххон хъæу Соцъийы. Райдиан ахуырад райста райгуырæн хъæуы. 1950 азы ахуыр кæнынмæ бацыд Уæллаг Черейы хъæуы астазон скъоламæ. Каст æй фæцис 1954 азы хорз бæрæггæнæнтимæ, æмæ йæ æнæ фæлварæнтæй ахуырмæ айстой Сталиниры педагогон училищемæ. Уыцы рæстæг ныффыста йæ фыццаг æмдзæвгæтæ.

1958—1963 азты ахуыр кодта Хуссар Ирыстоны паддзахадон педагогон институты филологон факультеты.

1963 азæй фæстæмæ куыста газет «Советон Ирыстон»-ы тæлмацгæнæгæй, уацхæссæгæй, Хуссар Ирыстоны радио æмæ телеуынынады комитеты сæрмагонд уацхæссæгæй, чиныгуадзæн «Ирыстон»-ы редакторæй. Фæстаг азты, суанг йæ амæлæты бонмæ, уыд газет «Советон Ирыстон»-ы культурæйы хайады сæргълæууæг. Владимир бирæ уарзта журналисты куыст, æмæ фæсаууонмæ каст фæцис Кировы номыл Хъазахстаны паддзахадон университеты журналистикæйы факультет Алма-Атайы.

Йе ’мдзæвгæты фыццаг æмбырдгонд «Хæхты фарн» рацыд 1983 азы. 1987 азы та — дыккаг æмбырдгонд «Зæххы рис». Йæ амæлæты фæстæ ма йын рацыд дыууæ чиныджы – «Фыдыбæстæ – мæ рис» (2005 азы) æмæ «æвзæрст уацмыстæ» (2015 азы). Сывæллæттæн ныффыста авд æмбырдгонды: «Кæсаджы фын», «Уалдзæг», «Мады зæрдæ», «Хуры тынтæ», «Булæмæргъы зарæг», «Бало цирчы» æмæ «Фыццаг мит».

Ирон æвзагмæ тæлмац кодта æфсымæрон литературæты минæвæртты хуыздæр уацмыстæ. Йæхи æмдзæвгæтæ тæлмацгонд сты уырыссаг æмæ гуырдзиаг æвзæгтæм, бирæтæ дзы систы зарджытæ. Икъаты Владимир 30 азæй фылдæр фæкодта сфæлдыстадон куыст, бантыстис ын 500 публицистон уацмысæй фылдæр ныффыссын.

Хуссар Ирыстоны дзыллæ стыр аргъ скодтой Икъаты Владимиры сгуыхтдзинæдтæн. Уый хорзæхджынгонд æрцыд республикæйы Кады грамотæйæ, йæ ном хæссынц уынг æмæ скъола Цхинвалы. 2003 азы йын йæ амæлæты фæстæ лæвæрд æрцыд РХИ-йы иууыл стырдæр хорзæх — «Кады нысаны орден», 2019 азы Дменисы хъæуы астæуккаг скъолайы кæрты та кадджын уавæры байгом йæ цыртдзæвæн.