Гутнаты Феликс

Гутнаты Феликс
Гутнаты Феликс
Райгуырды датæ	1952-æм азы 7 апрелы
Райгуырæны бынат	Дзӕуджыхъӕу, Уæрæсейы СФСР, Советон Цæдис;
Мæлæты датæ	2020-æм азы 10 декабры (68 азы)
Бæстæ	Советон Цæдис; Уæрæсе;
Ахуырадон къæпхæн	историон зонæдты доктор[d]
Ахуырадон ном	профессор

Гутнаты Хадзымырзæйы фырт Феликс (1952-æм азы 7 апрелы — 2020-æм азы 10 декабры) у ирон ахуыргонд, историк, историон зонæдты доктор, профессор.

Цардафыст

Феликс райгуырдис 1952-æм азы 7 апрелы Дзæуджыхъæуы. 1969-æм азы каст фæци сахары 5-æм скъола. Фæсидтысты йæм æфсадмæ: 1970-1972 азты службæ кодта Германы, стæй ахуыр кæнынмæ бацыд Цæгат Ирыстоны Хетæгкаты Къостайы номыл паддзахадон университеты историон факультетмæ. 1977-1978-æм азты стажировкæ кодта Ленинграды университеты Советон Цæдисы историйы кафедрæйы, 1979 азы та бацыд аспиратурæмæ. 1979 азы, æмгъуыдæй раздæр, бахъахъхъæдта кандидатон диссертаци. 1981 азæй фæстæмæ куыста Цæгат Ирыстоны зонадон-иртасæн институты (ныры Цæгат Ирыстоны Абайты Васойы номыл гуманитарон æмæ социалон иртæстыты институты) археологи æмæ этнографийы хайады. Уыимæ иумæ кодта ахуыргæнæджы куыст дæр – 1995 азæй фæстæмæ куыста ЦИПУ-йы. 1998 азы бахъахъхъæдта докторы диссертаци.

Гутнаты Феликс ахуыр кодта Ирыстоны астæузаманы истори, æмбырд кодта генеалогион таурæгътæ, æмæ сæ нымадта адæмы ивгъуыд сног кæныны историон æвидигæ суадоныл. Зындгонд бæрæгуат «Ирон хъæутæ»-йы фæстæ адæмы ’хсæн уæлдай нымаддæр уыд йæ фæстаг проекттæй иу — чиныг «Ирон мыггæгтæ». Аст азы дæргъы автор бакодта стыр куыст: йæ чиныгмæ бацыдысты мин ирон мыггаджы равзæрды историйы тыххæй æрмæджытæ. Ирыстоны мыггæгты чиныгыл кусгæйæ, бирæтæн фадат фæцис чиныджы сæ мыггæгты равзæрды истори ныммыхуыр кæнынæн, зындгонд профессионалон ахуыргонды æххуыс райсынæн. Уый тыххæй æппæт республикæйы дæр арæзт цыдысты мыггæгты советтæ, æмæ бæрæгуатæн цæттæ кодтой æрмæджытæ. Уыдоныл цыдис быцæуныхас, æмæ-иу рабæрæг кодтой Ирыстоны историимæ баст æнæнхъæлæджы цæвиттонтæ.

Куыстытæ

Генеалогические предания Осетии. Орджоникидзе, 1989
Средневековая Осетия. Владикавказ, 1993; Аристократия алан. Владикавказ, 1995
Ранние аланы. Владикавказ, 2001
Древо жизни. Владикавказ, 2007
Горский феодализм. Ч. I Владикавказ, 2007. Ч. II., 2008
Аланы: научно-популярные очерки истории. Владикавказ, 2011
Осетинские фамилии. Владикавказ, 2012
История Осетии с древнейших времен до конца ХVIII века. Т. 1. Владикавказ, 2012
История Осетии в ХIХ-начале ХХ века. Т. 2. Владикавказ, 2012
Обычное право осетин. Ч. I. Адаты Тагаурского общества (Список Норденстренга 1844 г.). Владикавказ, 2012
Горский феодализм. Часть III. Северный Кавказ в ХIII—ХV вв. Владикавказ, 2014
Осетинские фамилии. Владикавказ, 2014; Скифы. Аланы. Владикавказ, 2014
Нормы обычного права осетин. Часть II. Адаты обществ Западной Осетии. Владикавказ, 2015.