Губерман, Игорь Миронович

Сæрибар энциклопеди Википедийы æрмæг.
Губерман, Игорь Миронович

Игорь Мироны фырт Губерман (1936 азы 7 июлы, Харьков) у уырыссаг поэт, дзуттаг адæмыхаттæй; популярон ссис йæ афористон æмæ сатирикон цæппаррæнхъонты (гариктæ) фæрцы.

Цардафыст[ивын]

Игорь Губерман райгуырдис 1936-æм азы 7 июлы Харьковы сахары. Скъола каст фæуыны фæстæ бацыдис Мæскуыйы бастдзинады фæндæгты паддзахадон университетмæ (уырыс. Московский государственный университет путей сообщения; МИИТ). 1958-æм азы инженер-электричы дипломимæ фæцис каст ацы ахуырдон. Цалдæр азы фæкуыста йæ дæсныйадмæ гæсгæ, æмæ уыциу рæстæг фыста литературон уацмыстæ.

1950-æм азты кæрон базонгæ ис, фыццаг самиздатон журналтæй иу — «Синтаксис» чи мыхуыр кодта, уыцы А. Гинзбургимæ, стæй къорд æндæр сæрибаруарзæг философтæ, литератортæ æмæ нывгæнджытимæ. Уæды заман Губерман фыста зонадон-популярон чингуытæ, фæлæ куыд дарддæр, афтæ фылдæр куыста диссидентон æмдзæвгæтыл. Йæ «æнæофициалон» сфæлдыстады фыссæг пайда кодта фæсномыгтæй (зæгъæм, И. Миронов, Абрам Хайям).

1979-æм азы Губерманы æрцыдис ахст, стæрхон йын чындис ахæстоны фондз азы фæбадын. Бахаудис лагерьмæ. Уым кодта боныджы фыстытæ. Фæстæдæр, хасты уæвгæйæ, литератор ацы боныгты бындурыл ныффыста чиныг «Тезгъотæ барачы алфамбылай» («Прогулки вокруг барака», 1980; мыхуыргонд æрцыдис 1988-æм азы). 1984-æм азы поэт æрыздæхтис Сыбырæй. Дæргъвæтин рæстæджы дæргъы Губерманæн нæ уыдис фадат сахары пропискæ скæнын æмæ ссарын йæхицæн куысты бынат.

1987-æм азы Игорь Губерман афтыдис фæсарæнмæ, 1988-æм азæй фæстæмæ цæры Иерусалимы. Арæх вæййы Уæрæсейы, фæархайы, чиныгкæсджыты ’хсæн популярон чи у, уыцы поэтикон изæрты.